போர் பதற்றம்: சீனாவுக்கு “உறுதியுடனும், அமைதியுடனும்” ஜப்பான் பதிலளிக்கும்

இந்தியாவுக்கு அண்மையில், ஜப்பானின் ஒகினாவா தீவுகளுக்கு அருகில் சீனப் போர் விமானங்கள், ஜப்பானிய இராணுவ விமானங்களை நோக்கித் தங்கள் கட்டுப்பாட்டு ராடர்களை (Fire-Control Radar) இலக்கு வைத்த இரண்டு “அபாயகரமான” சம்பவங்கள் நடந்ததாக ஜப்பான் தெரிவித்துள்ளது. பல ஆண்டுகளில் இரு நாடுகளின் படைகளுக்கு இடையே நடந்த மிகவும் தீவிரமான மோதல்களாக இவை கருதப்படுகின்றன.

சீன – ஜப்பான் ராடார் மோதல்: முக்கிய விவரங்கள்

ஜப்பானிய இராணுவ விமானங்கள் மீது ராடார் ஒளியைப் பாய்ச்சுவது என்பது தாக்குதலுக்குத் தயாராவதற்கான ஒரு அச்சுறுத்தும் நடவடிக்கையாகப் பார்க்கப்படுகிறது.

சீனப் போர் விமானங்கள், ஜப்பானிய இராணுவ விமானங்களை நோக்கித் தங்கள் தீக் கட்டுப்பாட்டு ராடரை (Fire-Control Radar) குறி வைத்தன. இது, ஏவுகணை தாக்குதலுக்கு முன் இலக்கைப் பூட்டுவதற்குப் பயன்படுத்தப்படும் ராடார் ஆகும்.  ஜப்பானின் ஒகினாவா தீவுகளுக்கு அருகில் உள்ள சர்வதேச வான்பரப்பில்  இந்த இரண்டு சம்பவங்கள் நிகழ்ந்தன. இந்தச் சம்பவங்களில் ஈடுபட்ட J-15 ரக சீனப் போர் விமானங்கள், சீனாவின் ‘லியோனிங்’ (Liaoning) என்ற விமானம் தாங்கிக் கப்பலில் இருந்து ஏவப்பட்டதாக ஜப்பான் தெரிவித்துள்ளது.

ஜப்பானின் நிலைப்பாடு

ஜப்பானியப் பிரதமர் சானே டகாயிச்சி (Sanae Takaichi), “இந்த ராடார் ஒளியூட்டல், ஒரு விமானத்தின் பாதுகாப்பான பயணத்திற்குத் தேவையானதுக்கும் அப்பாற்பட்ட அபாயகரமான செயல்” என்று கண்டித்துள்ளார்.

ஜப்பான் இது குறித்துச் சீனாவிடம் கடுமையான எதிர்ப்பைப் பதிவு செய்துள்ளது.

பிராந்திய அமைதி மற்றும் ஸ்திரத்தன்மையைப் பேணுவதற்காகச் சீனாவின் இந்த நடவடிக்கைக்கு ஜப்பான் “உறுதியுடனும், அமைதியுடனும் பதிலளிக்கும்” என்று ஜப்பானிய பாதுகாப்பு அமைச்சர் ஷின்ஜிரோ கொய்ஸுமி (Shinjiro Koizumi) தெரிவித்துள்ளார்.

சீனாவின் மறுப்பும் குற்றச்சாட்டும்

ஜப்பானிய விமானங்கள், ஏற்கனவே அறிவிக்கப்பட்ட கடற்படை பயிற்சியில் ஈடுபட்டிருந்த சீனக் கடற்படை விமானங்களை மீண்டும் மீண்டும் அணுகிச் சீர்குலைத்ததாக சீனக் கடற்படை செய்தித் தொடர்பாளர் கர்னல் வாங் ஜுயெமேங் (Colonel Wang Xuemeng) இந்தச் சம்பவத்தை மறுத்துள்ளார்.

சீனா, ஜப்பானின் இந்தக் குற்றச்சாட்டுகள் உண்மைக்கு மாறானவை என்று கூறியுள்ளது.

இந்த மோதல்கள் சென்காகு/டயோயு தீவுகள் (Senkaku/Diaoyu Islands) என்ற சர்ச்சைக்குரிய பகுதிகளுக்கு அருகில் நடந்துள்ளன. இந்தத் தீவுகள் மீது ஜப்பானும் சீனாவும் உரிமை கோரி வருகின்றன.

முன்னதாக, ஜப்பானியப் பிரதமர் சானே டகாயிச்சி, தைவானுக்கு எதிராகச் சீனா இராணுவ நடவடிக்கை எடுத்தால் அது ஜப்பானின் பாதுகாப்பிற்கும் அச்சுறுத்தலாக அமையும் என்றும், அவ்வாறு நடந்தால் ஜப்பான் ‘கூட்டுத் தற்காப்பு உரிமையைப்’ பயன்படுத்தலாம் என்றும் எச்சரித்திருந்தார். இந்த அறிக்கை காரணமாகவே இரு நாடுகளுக்கும் இடையேயான உறவு மேலும் மோசமடைந்த நிலையில் ராடார் சம்பவம் நிகழ்ந்துள்ளது.

இந்த மோதல், பிராந்தியத்தில் போர் மூளும் அபாயத்தைக் குறிக்கும் ஒரு தீவிரமான இராணுவ நடவடிக்கை என்று வல்லுநர்கள் கருத்துத் தெரிவித்துள்ளனர். ஆஸ்திரேலியாவின் பாதுகாப்பு அமைச்சர் ரிச்சர்ட் மார்லஸ் (Richard Marles) சீன நடவடிக்கைககள் குறித்து ஆழ்ந்த கவலை தெரிவித்துள்ளார்.