“திருமணம் நின்றுவிட்டது!” – இந்திய நட்சத்திர கிரிக்கெட் வீராங்கனை மந்தனா கண்ணீருடன் உறுதி!

“திருமணம் நின்றுவிட்டது!” – இந்திய நட்சத்திர கிரிக்கெட் வீராங்கனை ஸ்மிருதி மந்தனா கண்ணீருடன் உறுதி! ‘முன்னோக்கிச் செல்ல வேண்டிய நேரம் வந்துவிட்டது!’

மும்பை: இந்திய மகளிர் கிரிக்கெட் அணியின் அதிரடி பேட்டரான ஸ்மிருதி மந்தனா, தான் இசையமைப்பாளர் பலாஷ் முச்சாலுடன் (Palash Muchhal) நிச்சயித்திருந்த திருமணத்தை ‘நிறுத்திவிட்டதாக’ அதிகாரப்பூர்வமாக இன்ஸ்டாகிராம் மூலம் உறுதிப்படுத்தியுள்ளார்.

மந்தனாவுக்கும், பலாஷ் முச்சாலுக்கும் இடையே நவம்பர் 23 ஆம் தேதி திருமணம் நடைபெற இருந்தது. முதலில் மந்தனாவின் தந்தை மருத்துவமனையில் அனுமதிக்கப்பட்டதால் திருமணம் ஒத்திவைக்கப்பட்டது. ஆனால், இப்போது முற்றிலும் திருமணம் நின்றுவிட்டதாக அவரே அறிவித்துள்ளார்.

இன்ஸ்டாகிராமில் அவர் வெளியிட்டுள்ள அறிக்கையில் தனியுரிமையைக் கோரியுள்ளார்.

“கடந்த சில வாரங்களாக எனது தனிப்பட்ட வாழ்க்கை குறித்துப் பல யூகங்கள் நிலவி வந்தன. இந்த நேரத்தில் நான் பேசுவது முக்கியம் என்று நினைக்கிறேன். நான் மிகவும் தனிப்பட்ட நபர், அதைப் போலவே இருக்க விரும்புகிறேன். ஆனால், திருமணம் நின்றுவிட்டது என்பதை நான் தெளிவுபடுத்த விரும்புகிறேன்.”

இந்த விவகாரத்தை இத்துடன் முடித்துக் கொள்ளுமாறு ரசிகர்களைக் கேட்டுக்கொண்ட மந்தனா, தங்கள் குடும்பத்தின் தனிப்பட்ட வாழ்க்கைக்கு மதிப்பளித்து, அவரவர் வேகத்தில் இந்தக் காயத்திலிருந்து மீண்டு வர இடம் தருமாறு கோரிக்கை விடுத்துள்ளார்.

“நம் அனைவரையும் வழிநடத்தும் ஒரு உயரிய நோக்கம் இருப்பதாக நான் நம்புகிறேன். எனக்கு அது எப்போதும் எனது நாட்டிற்காக உயர் மட்டத்தில் விளையாடுவதுதான். என்னால் முடிந்தவரை இந்தியாவுக்காக விளையாடி வெற்றிக் கோப்பைகளைப் பெற விரும்புவதே என்னுடைய நிரந்தர இலக்கு,” என்று உருக்கமாகக் கூறியுள்ளார்.

மந்தனா தனது அறிக்கையை, “முன்னோக்கிச் செல்ல வேண்டிய நேரம் வந்துவிட்டது (It’s time to move forward)” என்ற வார்த்தைகளுடன் நிறைவு செய்துள்ளார்.

சமீபத்தில் நடந்த மகளிர் ஒருநாள் உலகக் கோப்பையில், 54.25 சராசரியுடன் 434 ரன்கள் குவித்து, இந்தியாவுக்காக அதிக ரன்கள் எடுத்த இரண்டாவது வீராங்கனையாக அவர் இருந்தார் என்பது குறிப்பிடத்தக்கது. அடுத்ததாக இலங்கைக்கு எதிரான டி20 தொடரிலும், ஆர்சிபி அணியின் கேப்டனாக WPL தொடரிலும் மந்தனா களமிறங்க உள்ளார்.